انا عايز اول حاجة اعتذر عن التأخير فى ارسالى اختبار الترنيمة.ببساطة فى فرق بين انك تعرف عن ربنا حقيقة معينة و فرق انك تختبر الحقيقة دية و ده من ضمن اللى ربنا سمح انى اتعلمة الوقت اللى فات. الله يعرف يحمى من الموت حتى لو شكل العيان بيقول عكس كدة. الهنا فعلاً فى العلا اقدر.
ها حاول أختصر بقدر الامكان:
حصلت الحادثة يوم السبت الموافق 19-1-2008 و كان معايا ثلاث اصدقاء و اخويا
كنا ماشيين بجانب الرصيف و مش فى وسط الشارع كأى حد.
فوجئنا بسيارة بنزين (لورى محملة بنزين) جاية علينا على سرعة رهيبة وقعتنا و بعد كدة ابتدت تكمل تمشى و احنا كل دة تحتها بين العجلتين و اشكر ربنا ان المسافة اللى بين الشاسية و الأرض كانت كبيرة لولا كدة كنت مت .الحاجة اللى و قفت السيارة شوية انها طلعت على الرصيف و صدمت 7 سيارات راكنين.
الوقت دة كان صعب مش هاقدر اقول سهل لكن و انا تحت العجل كنت باصلى بحماية ربنا و فكرت ان حتى لو مت انا عارف انا هاشوف مين و فين رايح و دة بجد كان بيطمنى جداً.
السيارة وقفت و كان كل اللى على لسان الناس اللى فجأة اتجمعو انتو لسا عايشين؟
اللى يميز الموضوع انى بمجرد ما نطقت كلمة دم يسوع و حمايتة ترددت جوايا كلمات الأية اللى بتقول :" ان ابليس خصمكم كاسد زائر يجول ملتمساً من يبتلعة هو" ( كأسد و ليس أسد) .
شكل العيان بيقول موت لكن الله بيقول حياة،حماية،و نصرة لولاده.انا جلست على ظهرى 8 ايام فى السرير و طبعاً مع بعض الجروح و الكدمات ماكنتش اقدر اتحرك لأن كان عندى بوادر شرخ. الغريب كمان ان رجلى ظلت مزرقة بعد الحادثة يومين و فجأة بعد اليومين دول لقيت ان دم بيطلع منها و عرفت بعد كدة ان كان فية دم فاسد و طلع لوحدة و غير كدة كان ممكن يحصل تسمم، بس الله لما بيقرر يحمى، حمايتة بتبقى كاملة مش بيحب حد يكمل شغل وراه.
فى الوقت دة ما كونتش عارف اقول حاجة لله غير انة صالح الهنا، الله شاطر قوى و حنين قوى.
اللى كنت عايز اوصلة من الترنيمة مش اداء كويس على قد ما كان نفسى اى حد يسمعها يتنقله الحق وتوصله حماية الله اللى انا اختبرتها و عايز اقولكم ان طعم الترانيم بعد كدة مختلف
المجد كلة يرجع ليك يا رب الله مازال موجود بيعرف يسدد كل كل كل احتياج بحسب غناة فى المجد فى المسيح يسوع. مرفق بعض الصور بتاعت السيارات اللى خبطتهم اللورى و هما راكنين
الرب صالح.
نادر نشأت
أخر 7 مشاركات
أنت تتصفح المنتدى بصلاحيات الزائر 
اقتراع
